Karya : Endah Sulyana, S.Pd
Mangsa tatapakan marcapada
nguningakeun hiji bewara
genyas ci ibun semu alum
neuteup panon poe nu rek reureuh
aya walapatra nu katulis mangsa ieu lemah dikakaya
keur mulangkeun jati nu meh ilang disilih ku junti
Masih natrat na lelembutan
Koceak dengek nu meupeuskeun lalangse peuting
Atawa raga nu pejah
disaksian ku binabarna cahya surya
Alam ngaheab panas ku amarah
Barisan ipis maju makalangan
Najan teu pepek ku senjata
Tapi wuwuh padet
dieusi ku pelor-pelor kasumangetan
Gumuruh sora nembus langit pingpitu
Bumi oyag mapag gelebug angin harepan
Yeuh kaula putra bangsa…………………
Seja bumela narohkeun raga
Nyingkah anjeun, durjana..!
Sabab kiwari kaula datang
numbraskeun sagala wewesen
Kaula jangji nagri nu kungsi dirarajet
Maneh tong ngarasa ngaboga-boga
Sabab geus mangsana
rek dipulangkeun ka anak incu kaula
Keun,………ayeuna urang wangun hiji ciri
Kudu nanjeur kamerdekaan
Najan kudu diwangun kututunggul
nu baseuh ku darah kaula
Teruskeun,
Teruskeun jangji kaula
Binasakeun karaman angkara murka
Bhaktikeun raga tur nyawa
Wangun nagara anu raharja,
Nagri sugih mukti dina ridhona Ilahi.
Post a Comment
[ Gunakan Kotak Komentar Popup untuk Berkomentar ]Silahkan memberikan Kritik & Saran yang membangun untuk RizaL vM, demi menjadi Blog yang lebih baik lagi,... No SPAM ^_^